Како да го дигитализирате менито на вашиот ресторан

Дигитализацијата на менито звучи покомплицирано отколку што е. Во пракса, кај повеќето ресторани со кои работиме целиот процес завршува за еден работен ден. Еве што точно се случува.

Што ви треба пред да почнете

Само три работи:

1. Список на производи со цени — најдобро во Excel или Word документ, но фотографија од хартиеното мени исто така работи.
2. Фотографии од јадењата — не мора професионални. Добро осветлена фотографија од телефон е сосема доволна за почеток.
3. Категории — како сакате да биде поделено менито: предјадења, главни јадења, пијалоци, десерти.

Ако немате фотографии, менито може да се пушти и без нив, а сликите да ги додавате постепено.

Чекор 1: Структурирање на менито

Пред да внесете било што, разгледајте го менито критички. Ова е моментот кога повеќето ресторани откриваат дека имаат производи што никој не ги нарачува со години. Дигиталното мени ги прави таквите работи видливи, па искористете ја приликата да го исчистите.

Практично правило: ако една категорија има повеќе од 12 ставки, гостинот нема да ги прочита сите. Поделете ја.

Чекор 2: Внесување на производите

Кај нас овој дел го правиме ние — ни ги праќате материјалите и ние го поставуваме целото мени. Ако сакате сами, во админ панелот се додава категорија, потоа производи во неа, со име, опис, цена и слика.

Опис пишувајте краток. Две реченици се доволни, а најважната информација (состојки, алергени, големина на порција) оди во првата.

Чекор 3: Поставување на QR кодовите

Секоја маса добива свој QR код. Тоа е важно — кодот не е ист за целиот ресторан, туку по маса, за да системот знае од каде дошла нарачката. Кодовите се печатат на налепници или на држачи за маса.

Чекор 4: Обука на персоналот

Ова е чекорот што најчесто се потценува. Самиот систем е едноставен, но персоналот треба да знае што да прави кога гостин ќе праша како функционира. Обуката трае помалку од еден час и е дел од инсталацијата.

Најчестите грешки

• Премногу категории. Осум категории на телефонски екран е веќе многу.
• Слики со различен формат. Ако едни се пејзажни, други портретни, менито изгледа неуредно. Држете се до еден однос.
• Заборавени сезонски производи. Дигиталното мени треба да се ажурира кога менувате понуда — тоа е предноста, но бара навика.
• Нема алтернатива за гости без телефон. Задржете неколку хартиени менија за секој случај.

Колку трае вкупно

Од моментот кога ќе ни ги испратите материјалите до целосно функционално мени: обично еден до два дена. Самата инсталација на лице место трае 1-2 часа.

Ако сакате да видите како изгледа готово дигитално мени пред да одлучите, побарајте демо — прикажуваме реален пример од ресторан.