Како да направите дигитално мени за ресторан: чекор по чекор

Поставувањето дигитално мени не е техничка работа. Најголемиот дел од времето оди на подготовка на содржината, не на софтверот. Еве што реално се случува, по редослед.

Пред да почнете: подгответе три работи

1. Список на производи со цени. Најдобро во Excel или Word. Ако го имате само на хартија, сликајте го — тоа е доволно за почеток, но внесувањето ќе трае подолго.

2. Категории. Како сакате гостинот да го гледа менито: Појадок, Салати, Главни јадења, Пијалаци, Десерти. Не ги правете премногу — осум до дванаесет категории се доволни за повеќето објекти. Мени со триесет категории е потешко за листање отколку хартијата.

3. Слики, ако имате. Не ви се потребни за сите производи. Почнете со оние што најмногу се нарачуваат и со оние што сакате да ги продавате повеќе.

Чекор 1: Внесување на менито

Производите се внесуваат во админ панелот — име, цена, категорија, краток опис. Кај нашето дигитално мени внесувањето го правиме ние при поставувањето; вие го испраќате списокот во кој било формат.

Совет од пракса: не префрлајте сè од хартијата механички. Ако имате производ што никој не го нарачал шест месеци, дигитализацијата е добра прилика да го тргнете.

Чекор 2: Категории и редослед

Редоследот на категориите не е козметика. Она што е прво се гледа најмногу. Ако сакате да продавате повеќе десерти, десертите не смеат да бидат последни во листата.

Истото важи внатре во категоријата — производот на врвот добива најмногу отворања.

Чекор 3: Опис и состојки

Краток опис од една реченица е доволен. Составките се важни за гости со алергии, а исто така ги намалуваат прашањата кон келнерите.

Чекор 4: QR кодови

Кодот се генерира од системот и се печати. Три работи што луѓето ги грешат:

• Премал код. Ако е под 3 см, постари телефони тешко го фаќаат. Правете го најмалку 4 см.
• Лошо место. Кодот треба да е таму каде што гостинот гледа кога ќе седне — на масата, не на ѕидот зад него.
• Без објаснување. Додајте една реченица: „Скенирајте за мени”. Не сите гости знаат што е тоа.

Најпрактично е ламинирана картичка или налепница на секоја маса.

Чекор 5: Тест пред отворање

Скенирајте го кодот со два различни телефона — еден Android и еден iPhone. Проверете дали цените се точни и дали сликите се вртат правилно.

Колку време одзема

• Ако менито е во Excel: еден работен ден.
• Ако е на хартија или слика: два до три дена, зависно од бројот на производи.
• Печатење и лепење на кодовите: еден час за објект со дваесет маси.

Што се менува откако ќе почне

Првата недела ќе забележите дека дел од гостите сè уште бараат хартиено мени. Тоа е нормално и не значи дека одлуката е погрешна — држете неколку печатени примероци за нив.

Втората работа што ја забележуваат сопствениците е дека промената на цена трае секунди наместо ново печатење. Тоа е моментот кога дигиталното мени почнува да се исплаќа.

Ако сакате да видите како изгледа со вашето мени пред да одлучите, пишете ни — поставуваме дел од вашето мени за да го видите на телефон.